معلومات عن اللعبة
بتدور أحداثها غالبًا في اليابان الإقطاعية، حيث تواجه جيوشًا من الشياطين والمخلوقات الخارقة باستخدام السيوف والأسلحة التقليدية، مع وجود ألغاز واستكشاف وتطوير للقدرات والأسلحة.
بصراحة، كابكوم ماشية في طريق الانتصارات السنادي ومش ناوية توقف. بعد ما قفلت Onimusha: Way of the Sword، أقدر أقولكم إن التجربة دي أصلية ومميزة جداً. اللعبة خطفتني بشخصياتها المليانة حيوية، والرعب النفسي اللي بتقدمه، ونظام القتال الاستثنائي. صحيح حسيت بشوية تكرار وإنها أطول من اللازم، لكن بمجرد ما كنت بدخل في قتال مع واحد من الزعماء الأسطوريين، كنت بنسى أي عيب فيها تماماً.
ايه اللي أبهرنا في تجربة Onimusha: Way of the Sword ؟
- نظام قتال عبقري ومرن: أكتر حاجة استمتعت بيها في التجربة هي القتال؛ اللعبة إديتني أدوات كتير زي الصد والمراوغة والضربات الخاطفة (Issen strikes). عجبني جداً إن اللعبة مش بتعاقبني لو حبيت ألعب في المضمون، بس في نفس الوقت بتكافئني وبتديني إحساس رهيب بالرضا لو قررت آخد المخاطرة وأخلص الماتش بضربة معلم في ثواني.
- بطل كاريزما لأبعد حد: شخصية “موساشي” من أمتع الشخصيات اللي لعبت بيها مؤخراً. المطورين اقتبسوا شكله وتعبيراته من الممثل الأسطوري “توشيرو ميفوني”، وده خلاه شخصية ساخرة، واثقة في نفسها، وبتتحرك بأسلوب ممتع خلاني أتعلق بيه من أول مشهد.
- زعماء بمستوى خرافي: من واقع تجربتي، كابكوم هنا استخدمت خبرتها الكبيرة في تصميم معارك Monster Hunter عشان تقدملنا زعماء تصميمهم عبقري وحرفياً هيفضلوا محفورين في ذاكرتي لفترة طويلة.
- أجواء رعب دموية ومختلفة: اللعبة فاجأتني بميلها للرعب النفسي والجسدي (Body horror) اللي فكرني بأجواء Silent Hill، وده خلاها في أوقات كتير مرعبة ومربكة بشكل ممتع جداً ومختلف عن اللي متعودين عليه.
ايه اللي ممكن يخلي تجربتك صعبة في Onimusha: Way of the Sword ؟
- شوية مط وتكرار: اللعبة خدت مني حوالي 25 لـ 30 ساعة، وحسيت إنها كان ممكن تكون أقصر وأمتع بكتير. أحياناً كنت بلاقي نفسي بعيد استكشاف مناطق أو بواجه نفس الزعماء الصغيرين (Mini-bosses) كذا مرة، وده كان بيفصلني شوية من الحماس.
- نظام تطوير سطحي: نظام ترقية الأسلحة والقدرات حسيته بسيط بزيادة ومفيش تخصيص حقيقي (يعني أرقّي السيف ألاقي قوة الهجوم زادت 2% بس، حاجة مش محفزة أوي).
- وكالعادة كواحد مهتم جداً بمحتوى الألعاب، كان نفسي بجد أشوف اهتمام بوجود تعريب كامل للعبة عشان نندمج إحنا واللاعبين العرب أكتر مع القصة والشخصيات الرهيبة دي، التجربة كانت هتبقى في حتة تانية خالص.
إليكم أيضًا:
الإيجابيات
- أجواء رعب دموية ومختلفة
- زعماء بمستوى خرافي
- نظام قتال عبقري ومرن
- بطل كاريزما لأبعد حد
السلبيات
- نظام تطوير سطحي
- شوية مط وتكرار
الخلاصة
لعبة بتقدم رؤية مميزة جداً للأكشن وبتكافئك على مجهودك. رغم شوية التكرار البسيط، الجيم بلاي والقتال غطوا على أي حاجة تانية وخلوني أعتبرها واحدة من أمتع ألعاب الأكشن السنادي. تجربة ممتازة وبنصحكم جداً تلعبوها!
