مراجعة لعبة FC 27

FC 27 بالنسبة ليا مش الثورة اللي هتغيّر ألعاب كرة القدم، لكنها خطوة واضحة في الاتجاه الصح بعد FC 26. أهم حاجة إن الجيم بلاي نفسه بقى أكتر اعتماداً على المهارة، والدفاع والتمرير والتكتيكات بقوا أمتع وأعمق، والـCareer Mode أخيراً حصل على تطوير محترم. لكن في المقابل، The Grounds مش بالمستوى اللي EA قدمته بيه، والـAI والمشاكل التقنية لسه قادرين يضيعوا متعة مباريات كاملة، وUltimate Team محتاج أكتر من مجرد تعديلات صغيرة.

إيه الحاجات اللي خلت FC 27 أحسن بالنسبة ليا؟

• الدفاع أخيراً بيعتمد عليك: من أكتر التغييرات اللي فرقت السنادي إن اللعبة بطلت تخلي الـAI يعمل معظم الشغل الدفاعي مكانك. لازم تبدّل بين اللاعبين صح، تقرأ حركة الخصم وتختار توقيت التدخل بنفسك. لو غلطت هتتعاقب، ولو دافعت صح فعلاً بتحس إنك أنت اللي كسبت الكرة، وده عمل Skill Gap واضح كان ناقص السلسلة من فترة.
• التمرير والهجوم بقوا محتاجين تفكير: الـThrough Balls والتمريرات الصعبة مبقتش زرار بيتضغط والكرة توصل لوحدها. الاتجاه والتوقيت بقوا مهمين جداً، والـAI الهجومي بيعمل تحركات أحسن تساعد على بناء الهجمة بدل الجري العشوائي. وحتى العرضيات بقت أخطر وأمتع لما تستخدمها صح.
• التكتيكات أخيراً ليها معنى حقيقي: نظام الـTactics من أقوى إضافات FC 27. بقيت تقدر تتحكم بشكل أوضح في طريقة تحرك فريقك أثناء مراحل اللعب المختلفة، وتبني الخطة حوالين مميزات لاعيبتك بدل ما الموضوع كله يبقى Formation وتعليمات محفوظة. ودي واحدة من الحاجات اللي فعلاً قربت اللعبة أكتر من كرة القدم الحقيقية.
• Career Mode أخد الحب اللي كان محتاجه: بالنسبة لي دي أكبر قفزة خارج الملعب. المفاوضات بقت أعمق، الصفقات ممكن تدخل فيها أندية منافسة، وفيه أقساط ومكافآت وشروط أكتر، وحتى مستوى اللاعب ممكن يتأثر بالفورمة واللياقة والمعنويات خلال الموسم. لأول مرة من فترة حسيت إن الـCareer Mode مش مجرد نفس النسخة مع شوية قوائم جديدة.
• الإحساس بالمباريات اتحسن: الفيزيائية والإضاءة وتحركات اللاعبين أخدت تحسينات ملحوظة، والأجواء الجماهيرية بقت تتفاعل بشكل أحسن مع نتيجة وأحداث المباراة. مش نقلة جرافيكية ضخمة، لكن التفاصيل الصغيرة خلت الملعب نفسه يحس أحسن من FC 26.

إيه اللي فصلني شوية في FC 27 وكان ممكن يكون أحسن؟

• The Grounds أقل بكتير من الضجة اللي حواليه: دي المفروض تكون إضافة FC 27 الرئيسية، لكن التنفيذ محبط. فكرة العالم الاجتماعي حلوة على الورق، وفيه مباريات صغيرة وأنشطة ممتعة، لكن التجول نفسه ساعات بيحسسك إن فيه عالم كامل معمول عشان يوصلّك لحاجات كان ممكن تدخلها من Menu في ثواني. كمان الجرافيكس والأنيميشن والأداء داخل المنطقة مش بالمستوى المتوقع.
• الـAI لسه ممكن يبوظلك كل اللي بنيته: رغم إن التكتيكات أحسن، ساعات المدافعين اللي مش متحكم فيهم بياخدوا قرارات غريبة، يتجاهلوا كرة 50/50 أو يتحركوا في اتجاه غير منطقي. وحتى التمرير ساعات يقرر يبعث الكرة للاعب المغطى بدل الزميل المفتوح اللي كنت قاصده. ودي مشكلة مزعجة جداً في لعبة بتحاول تعتمد أكتر على المهارة.
• Ultimate Team لسه Ultimate Team: فيه تحسينات لطيفة وتنظيم أحسن لبعض الأنظمة، لكن مفيش الثورة الكبيرة اللي تخليك تحس إن المود اتغير فعلاً. الجرايند موجود، العملات والاقتصاد بقوا أعقد، ولسه واضح جداً إن اللعبة عايزة تخليك تقضي وقت أو فلوس أكتر جوه المود.
• المشاكل التقنية والقوائم محتاجة شغل: بطء في بعض القوائم، تقطيع في أماكن معينة، مشاكل اتصال وسيرفرات، وأنيميشنات وتصرفات غريبة بتظهر من وقت للتاني. المشاكل دي مش بتدمر التجربة بالكامل، لكنها بتأكد إن اللعبة كانت محتاجة مرحلة صقل أطول قبل الإطلاق.

إليكم أيضًا:

• قبل ما تدخل أي ماتش في FC 27 غيّر الإعدادات دي الأول

تقييم إلعب

لازم تلعبها

إلعبها

فوتها

ما تلعبهاش

أوعى تلعبها

الإيجابيات

• +الدفاع أخيراً بيعتمد عليك
• +التمرير والهجوم بقوا محتاجين تفكير
• +التكتيكات أخيراً ليها معنى حقيقي
• +Career Mode أخد الحب اللي كان محتاجه:
• +الإحساس بالمباريات اتحسن:

السلبيات

• −The Grounds ملباش التوقعات ولسه محتاج شغل
• −المشاكل التقنية والقوائم محتاجة شغل
• −الـAI لسه ممكن يبوظلك كل اللي بنيته

الخلاصة

لو EA حافظت على الجيم بلاي الحالي وما قلبتهوش بالتحديثات، FC 27 ممكن تبقى واحدة من أحسن نسخ السلسلة في آخر كام سنة. لكن في وضعها الحالي؟ لعبة كورة ممتعة ومحسّنة بوضوح… بس لسه بعيدة عن إنها تكون التجربة الكاملة اللي السلسلة محتاجاها.

عبدالرحمن أحمد

رئيس التحرير

صانع محتوى ومهتم بكل ما يتعلق بعالم الألعاب والتقنية. شغفي يبدأ من متابعة آخر الأخبار والإعلانات، وصولًا إلى تحليل التفاصيل التي قد لا يلاحظها الكثيرون. أسعى دائمًا لتقديم محتوى يضيف قيمة حقيقية لمجتمع اللاعبين العربي.